भगवान राधाकृष्णको ९५ औ रथयात्रा हुँदै

बिराटनगर / २०८३ भदौ १७ / भगवान राधा कृष्णको ऐतिहासिक रथयात्रा यही भदौ २० गते सम्पन्न हुदैछ । रथयात्राको सबै तयारी पूरा भैसकेको राधाकृष्ण मन्दिर कार्यसमितिका अध्यक्ष कैलाश रेग्मीले जानकारी दिनुभयो ।

राधाकृष्णको रथयात्रा सफलता साथ सम्पन्न गर्न समारोह समितिले रथमार्ग सङ्केत निर्देशन उपसमिती, झाकी ब्यबस्था, रथ श्रीङ्गार, स्वास्थ्य र प्राथमिक उपचार,स्वयंसेवक, प्रसाद ब्यबस्था, पिउने पानी,फोहोर ब्यबस्था, सामाजिक सन्जाल, प्रचार प्रशार, ब्राम्हण ब्यबस्थापन, पुजा, निमन्त्रणा उपसमिती लगायत विभिन्न २१ वटा उपसमितीहरु बनाइएको छ ।

भदौ १० गतेको बिनासकारी बाढी प्रभाबितहरुको सहयोगको लागि रथयात्रामा उठेको सम्पुर्ण भेटी रकम प्रधानमन्त्री दैबीप्रकोप उद्दार कोष मार्फत पठाइने भएको छ । रथयात्रामा करिब २ लाख रुपया जम्मा हुनेगरेको बिगतको अनुभव छ । उक्त कुरा राधाकृष्ण मन्दिर कार्यसमितिले आज आयोजना गरेको पत्रकार सम्मेलनमा जानकारी दिएको हो ।

रथयात्राको क्रममा विभिन्न ४४ स्थानमा भक्तजनहरुलाई पुजा आराधनाको लागि रथलाई विश्राम गराइने छ । रथले ६ घण्टामा बिराटनगर शहरको करिब ८ किलोमिटर क्षेत्रको परिक्रमा गर्नेछ ।

रथयात्रामा हुनसक्ने अपराधिक कृयाकलाप रोक्न ९०० बढी सुरक्षाकर्मी परिचालन हुनेछन । प्रहरीले उक्तदिन बहुमुल्य बस्तुहरु नबोक्न र साना बालबालिका नल्याउन सर्बसाधारणसग अनुरोध गरेको छ । यसबर्ष डीजेको प्रयोग निशेध गरिएको पनि समितिले जनाएको छ ।